狗婆婆、狗伯伯特別護理手冊

一般黎講，狗狗七歲之後就會開始進入老年期。隨住狗狗年齡增加，狗狗嘅身體機能亦會隨之出現退化嘅徵狀。呢個時侯，主人們就需要提供更貼心嘅照顧俾狗狗～

飲食方面

踏入老年期，狗狗身體機能開始轉差，狗狗唔會再好似以前咁活躍。運動量嘅改變會令狗狗腸道嘅消化同吸收能力出現變化。主人要留意，唔好餵太多硬性食物俾年老嘅狗狗食，仲要適當咁幫狗狗補充鈣質、鐵質同維他命～

牙齒方面

年紀大嘅狗狗牙齒會相對冇咁堅固，狗狗會開始唔想咬骨頭又或者潔齒嘅玩具，從而令牙齒更容易出現牙結石。狗狗老左，主人要更常幫狗狗刷牙，減少佢地牙齦發炎、被口腔細菌入侵狗狗體內器官嘅機會。

關節方面

體型比較大，又或者有肥胖問題嘅狗狗係關節炎同骨頭疾病嘅高危一族。就好似我地人類咁，老人家嘅關節問題好多時都令佢地唔想郁。如果狗狗開始行動不便，唔可以再好似以前咁日日去散步，主人可以喺狗狗訓覺休息嘅時侯輕輕幫狗狗按摩佢地手手腳腳嘅肌肉，又或者幫佢地伸展四肢嘅關節。當然，如果狗狗喺行動上出現左好大問題，主人最好都係帶佢去獸醫度接受專業治療。

狗用番皂DIY

想幫狗狗買番皂幫佢洗白白，但市面上嘅沖涼液或番皂一係就太重香精，一係就冇乜用，沖完狗狗仲係有好大陣體味？唔洗怕，想狗狗乾乾淨淨得黎，又唔會俾人工香味淹沒，方法其實好簡單：DIY！^_^

 

材料

椰子油    240g

橄欖油    200g

芥花籽油        120g

米油                160g

苦楝油    80g

常溫開水        265g

氫氧化納        114g

 

1. 將氫氧化納倒入水中，不停攪拌，直至氫氧化納完全溶解水中。
2. 將氫氧化納放在一旁待涼。
3. 將椰子油、橄欖油、芥花籽油、米油和苦楝油倒進鍋中，並且攪勻。
4. 將混合油加熱至攝氏43度，其間須用溫度計測溫。
5. 當氫氧化納亦降溫至攝氏43度，將其倒進混合油中，用金屬匙加以攪勻。
6. 用打蛋器攬拌混合物，直至30分鐘溶液變稠，轉至奶白色。
7. 將混合物倒入定型模，用布包好，等24小時後脫模。
8. 脫模之後把製成品風乾一個月。

大功告成！可以用喇～

牙結石咩黎架？

我地每個星期都提住各位主人要幫狗狗做好牙齒護理，如果唔係狗狗好易有牙結石嘅問題。但原來仲有主人唔係好清楚咩係牙結石～今次就詳細同大家講解一下到底牙結石係咩東東啦！

牙結石通常出現喺狗狗牙齒嘅頸部。對口腔黎講，牙結石係一種異來物，佢會不停刺激狗狗嘅牙周組織，壓住牙齦，導致牙齦發炎，最後病菌感染，牙周支持組織被破壞，搞到狗狗甩牙。再嚴重啲嘅話，口腔病菌更會入侵狗狗身體入面嘅器官，危害狗狗嘅生命安全，真係不容忽視架！！

話雖如此，但主人唔駛怕～牙結石嘅形成速度同型態係因狗狗而異嘅。一般黎講，牙結石喺開始嘅時侯會偏軟身，出現得耐左之後就會因為慢慢鈣化而變得硬身，而且難以清除。獸醫就建議主人最好每隔一兩日就幫狗狗刷一次牙同每日餵飼潔齒骨，喺狗狗牙齒上嘅結石鈣化之前幫佢清走牙結石，如果唔係愈積愈多，好易就會形成牙周疾病架喇～！

預防狗狗耳炎須知

成日都提主人們記得幫狗狗護齒潔齒，但原來除左牙齒之外，狗狗嘅耳仔都好需要定期清潔架！如果狗狗耳仔唔乾淨，狗狗有可能會患上耳炎，到時就大件事喇>_< 主人千祈唔好以為幫狗狗清潔耳仔好麻煩，其實只需要跟住以下三大步驟做，主人就可以幫狗狗預防到耳炎架喇～

第一步

洗耳之前，主人應該先固定好狗狗嘅位置，唔好俾佢周圍郁。如果唔係洗耳果陣可能就會整親狗狗。固定好狗狗之後，將狗狗用嘅洗耳液對準狗狗耳道，擠出洗耳液。呢個時侯，狗狗會因為唔適應而郁黎郁去，主人要小心唔好俾洗耳液嘅樽頸整親狗狗。

第二步

等狗狗慢慢開始適應之後，主人就可以用手 輕輕按摩狗狗嘅耳仔底部，方便洗耳液流入內耳道，全面清潔狗狗嘅耳仔。

第三部

按摩完，用棉花輕輕抹走從狗狗耳仔流出嘅分泌物。大功告成～

記住呀～狗狗嘅耳仔應該呈健康嘅粉紅色！主人們記得要從狗狗細個開始幫佢地做好耳仔清潔～咁就唔駛怕狗狗患耳炎啦：）

狗狗應節美食－搞乜鬼南瓜批

 

嘩嘩嘩！話咁快就過完中秋，好快就到扮鬼扮馬嘅萬聖節喇～！ 雖然香港冇乜俾狗狗同主人同樂嘅萬聖節活動，但主人想同狗狗一齊感受節日氣氛都唔係完全冇方法架～點做好？快啲趁星期六日買定材料，整一個「搞乜鬼南瓜批」，同狗狗一齊開開心心食住過萬聖節啦～

材料

牛油                45g
雞蛋                2.5隻
低筋麵粉        130g
南瓜蓉    380g
水            100g
蜜糖                15g
食用裝飾        視乎個人喜好

Steps

1.將牛油熱溶，加入半隻生雞蛋，用筷子攪勻。
2.將牛油同生雞蛋嘅混合物加入低筋麵粉，搓成粉團。
3.將粉團放入批盤做批底，放入焗爐用180度焗4分鐘。
4.將蜜糖倒入南瓜蓉，慢慢加2隻雞蛋同水，並加以攪勻。
5.將南瓜蓉混合物倒入批底，再以180度焗15分鐘。
6.取出南瓜批，加上主人鐘意嘅食用裝飾，大功告成！食得喇～

肉墊保護天書

好多人都話狗狗身體上最可愛嘅就係佢地粉紅色嘅手掌腳掌～其實果個位並唔係狗狗嘅手腳掌，正確嘅叫法應該係肉墊。既然呢個部位咁可愛，主人一定要幫狗狗好好保護肉墊！點保護先岩？其實有３大方法嘅～

1.      減少喺石路散步時間
香港嘅路大部份都係用石屎堆砌而成，而石屎路往往都好吸熱。尤其夏天，太陽光猛嘅時候，我地掂到地下都會忍唔住熱到跳起！雖然狗狗肉墊厚，對溫度嘅反應比較慢，但其實狗狗嘅肉墊係會燙傷架～所以氣溫高嘅日子，主人們最好避免帶狗狗喺石屎路散步！
 

2.      散步後清潔狗狗肉墊
我地人類出街會着鞋去保持雙腳乾淨，但就唔係所有狗狗都有呢個福利喇～由於室外嘅環境比較多細菌，狗狗散完步番到屋企，肉墊會黏住啲污糟野，而呢啲污糟野有機會搞到狗狗趾間發炎、紅腫，所以主人同狗狗出街散完步記住幫佢地清潔一下肉墊，好好保護肉墊喇～

3.  小心處理肉墊傷口

肉墊皮膚雖然厚，但狗狗出街散步俾石仔“吉＂親整親嘅機會仲係非常之高！通常狗狗肉墊受左傷，主人都會睇得出嘅，因為狗狗會即刻變到只用３隻腳行路～如果狗狗整親肉墊，主人記住要每日都幫佢嘅傷口消毒，直至完全好番哂！如果發現佢嘅傷口腫脹或者含膿，又或者好耐都未好番，主人們千祈唔好拖～記住帶狗狗去睇醫生喇！

狗狗時裝Yes or No

天氣開始轉涼，主人會唔會心郁郁想幫狗狗添衣呢？而家市面上出現左愈黎愈多又靚又有型嘅狗仔衫衫，不過，其實唔係所有狗狗都適合着衫仔架～！唔知自己隻狗狗岩唔岩着衫衫？而家就同你分析下着衫嘅好處同壞處，俾主人你分析自己隻狗狗着唔着衫好啦～

好處１：保持狗狗皮毛清潔～

之前同大家分析過，唔建議主人成日幫狗狗沖涼。不過，狗狗貪玩，成日跑跑跳跳，仲成日周地碌，好易污糟！如果有件衫仔俾佢着，狗狗喺地下碌果陣，身體就唔會直接接觸到地面，咁就可以保持佢嘅皮毛乾淨衛生啦～

好處２：保暖作用

狗ｂｂ同老人家狗狗抵抗力比較弱，亦相對起一般健康嘅狗狗怕凍。所以當天氣凍嘅時候，主人不妨幫狗狗着番件褸，幫佢地保暖之餘，亦起到預防感冒嘅作用：）

壞處１：誘發皮膚病

短毛狗狗着左衫之後，衫仔嘅布料就會直接喺狗狗嘅皮膚上摩擦。如果狗狗嘅皮膚本來就比較幼嫩同敏感，狗狗就可能會出現皮膚紅腫、敏感、甩毛、甩皮等等嘅徵狀＞＿＜

壞處２：令狗狗失去自身恆溫能力

每隻健康嘅狗狗都有天生嘅恆溫能力，識得隨住季節同溫度自我調整身體，習慣氣溫。如果主人俾衫衫佢地着，令狗狗嘅身體習慣咗外在嘅幫助，佢地就會慢慢失去身體嘅恆溫能力。

3招K.O.狗狗口臭問題

好多主人一直都錯誤解讀，以為狗狗有口氣問題係正常嘅。但其實唔係架！狗狗嘅口臭可以由好多唔同嘅原因引起，只要主人搵到問題所在，再勤於幫狗狗護理口腔同牙齒，狗狗就可以重新擁有清新口氣喇～今次就同大家分享3大消除狗狗口氣嘅妙法！

第一招：良好飲食習慣

狗狗嘅日常飲食習慣對佢地嘅牙齒健康係有好大影響架～有啲主人習慣放足一日份量嘅狗糧喺狗糧盤度，方便狗狗隨時想食就食。但原來呢種做法對狗狗嘅牙齒健康百害而無一利架！因為狗狗每次食野嘅時候，口腔內嘅細菌都會活躍起黎。俾狗狗隨時食，即係縱容佢口腔入面嘅細菌隨時活躍＞＿＜除此之外，主人亦可以減少餵狗狗食濕糧，取而代之用乾糧代替。因為對比起乾糧，濕糧容易黏住狗狗牙齒表面，形成牙垢，導致口氣問題。

第二招：勤刷牙

我地朝早起身唔刷牙個口都會有陣味啦，何況係為食嘅狗狗呢？如果刷牙可以幫我地去除口氣，咁佢一樣幫到狗狗解決口氣問題。其實每個主人都應該定期幫狗狗進行牙齒護理同清潔。每星期，主人都應該抽空幫狗狗刷３至４次牙，咁先可以確保到狗狗牙齒乾乾淨淨，口氣清新～就算唔得閒幫狗狗日日刷牙，主人都可以每日都餵狗狗食潔齒骨，幫狗狗全面護齒：）

第三招：專業檢查不可缺

除左多啲幫狗狗刷牙之外，主人亦應每年帶狗狗去獸醫度檢查牙齒，接受專業嘅診斷。獸醫除左會幫狗狗睇下佢地嘅牙仔健唔健康之外，仲會幫狗狗洗牙，清理佢牙齒表面嘅牙菌斑同牙垢。咁就可以確保狗狗口腔牙齒乾淨健康冇異味啦～

狗狗必Like生日禮物

狗狗生日係每年一度最令主人頭都爆嘅日子，送野食又覺得自己冇誠意，送玩具又怕狗狗唔鍾意。呀～～～好頭痕呀！！不過，由今日開始主人再唔需要怕喇！因為我幫大家搜羅左3樣狗狗必like嘅生日禮物～仲諗？快d喺下面揀番樣送俾狗狗啦！

狗狗必Like禮物第3位 : 潔齒骨

成日聽人講「牙痛慘過大病」，其實呢句野唔係淨係啱用喺我地人類身上架！狗狗嘅牙齒健康其實都非常重要！狗狗生日，主人一定會安排好多美食俾狗狗食，同佢慶祝。但食完咁多正野，狗狗嘅牙齒就受罪喇！細心嘅主人記住買有認證嘅潔齒骨俾狗狗做生日禮物，等狗狗食完美食都可以keep住牙齒靚靚仔仔、健健康康！

狗狗必Like禮物第2位 : 玩具波

波波係狗狗玩具界之中最受歡迎嘅玩具之一。狗狗鍾意一啲表面唔光滑，方便狗狗咬起嘅波波～如果呢啲波波咬起黎有聲，狗狗就更鍾意喇！趁狗狗生日，買個佢一定鍾意嘅波波同佢地玩啦！

狗狗必Like禮物第1位 :主人

其實主人你嘅陪伴對狗狗黎講就係最好嘅生日禮物。 試諗下你平時番工會用幾多時間陪狗狗？每日你放工番到屋企，換件衫食一食飯，玩一陣電腦就訓覺，而狗狗就只可以望住你行黎行去，直至你訓為止。唔好再留低狗狗自己一個喇！其實狗狗好鍾意好鍾意同你玩架主人！快d拎埋狗狗最鍾意嘅玩具，陪佢玩番一日，享受快樂嘅相處時間啦！

狗狗口臭成因遂個數

狗狗個口有異味，主人覺得理所當然？NO  WAY！主人們千祈唔好有呢個咁錯嘅觀念呀！其實如果狗狗牙齒健健康康、乾乾淨淨嘅話，佢地係唔會有口臭嘅問題架！仲未明狗狗點先會有口臭？等我同大家講解一下啦！其實狗狗口臭係有3大成因嘅～

1.      口腔清潔做唔夠
狗狗同人類一樣，食完野會有食物殘渣留喺牙齒表面，需要靠刷牙去除牙垢。試諗下如果我地口腔清潔做得唔足夠，我地個口都會有異味啦！何況狗狗？所以主人記住要每星期幫狗狗刷3－4次牙～仲要年年都帶狗狗搵獸醫洗牙！如果可以嘅，最好每日都俾一枝潔齒骨狗狗食，幫狗狗隨時護齒，咁佢個口就包冇異味啦：）

2.      患有口腔或牙科疾病
主人點努力幫狗狗清潔牙齒，狗狗個口都仲係有陣味？呢個情況可能代表狗狗已經患有口腔或者牙科疾病！原來，口腔細菌感染、嘴唇潰瘍同牙齦炎等等嘅口腔問題都會引起口臭！如果狗狗除左口臭之外，仲有口腔傷口同不斷流口水嘅問題，主人就要快啲帶佢地求醫，接受專業嘅診斷喇>_<

3.      消化不良
除左口臭問題，狗狗仲成日唔想食野，體重又突然變輕，兼伴隨住肚痾嘅徵狀？主人要留意番～狗狗可能係消化不良喎！呢個時侯，主人可以俾狗狗食含益生菌嘅營養補充品。益生菌唔單止可以幫狗狗調理腸道菌群平衡，仲非常有利於狗狗對唔同食物營養嘅消化吸收添～好有益架！

主人明白點解狗狗會有口臭問題未呢？唔好再咁傻豬仔，以為狗狗口臭好正常喇！仲未知清楚狗狗有口氣可以點做？下次就等我再詳細啲同大家講下點樣幫狗狗解決口臭問題啦～下次見：）

狗BB飲食指南

想狗狗健健康康咁成長，一定要從佢地嘅飲食開始入手。而呢樣野一定要由細開始做起～咁到底主人到底要點餵，狗ＢＢ先可以健健康康咁成長呢？一齊黎睇下三大狗ＢＢ飲食守則啦～

1.  定時定點餵食
主人們千祈唔好唔理時間，隨時隨地睇心情餵狗狗食野！想培養狗狗良好嘅飲食習慣，主人就要每次都喺同一時間、同一地點餵同一份量嘅野俾狗狗食。而狗狗每次食完野，主人亦應該即刻收拾並清潔番狗糧盤，以保持狗狗食具清潔。

2. 每日只須８分飽
香港好多主人都太寵狗狗，知道狗狗鍾意食野就係咁俾佢食。其實咁嘅做法係超！級！唔！啱！架！而最合適嘅份量就係俾狗狗食到８分飽～唔知狗狗點食先算８分飽？主人可以喺啱啱開始餵狗狗食野嘅時候放多啲狗糧落佢嘅狗糧盤度，睇下狗狗最多可以食幾多，再大概估量一下８分飽嘅分量就問題clear啦：）

3.  循序漸進換新糧狗糧分有幼犬糧同成犬糧，主人喺幫狗狗換糧嘅時候可以睇番成份同效用幫狗狗揀啱佢地食用嘅。之不過，換糧係唔可以心急架～狗主一定要有耐性，將新糧同舊糧慢慢轉換。如果你一次過將狗狗嘅野食轉哂，狗狗可能會因為唔適應而搞到腸胃不適！想狗狗開開心心變大個仔，主人要識做呢～

關於狗狗不能說的祕密

狗狗唔識講人類嘅語言，好多時佢地只可以用身體語言同我地溝通。不過作為主人嘅我地係唔係真係咁了解狗狗想表達嘅野呢？今日就等我同大家剖析一下狗狗一啲好常見、但主人又唔明白嘅動作啦～

打喊露

好多主人都以為狗狗打喊露代表佢地攰又或者眼訓，其實唔一定架！對於狗狗黎講，打喊露係一種情緒嘅表達。當狗狗覺得好緊張，又或者有壓力嘅時候，佢地就會打喊露架喇～

用鼻聞地下

狗狗對世界充滿好奇。好多時佢地都會不斷周圍聞去發拓新鮮事物。但原來除此之外，狗狗仲會用聞地下嘅方式令自己嘅情緒冷靜落黎～下次見到狗狗聞地下，主人們不妨去摸一摸佢地個頭，俾啲安慰佢地：）

「硬哂軚」

主人們有冇見過狗狗突然「硬哂軚」，手手腳腳甚至身體都變得異常繃緊？原來當狗狗有咁嘅狀態，主人就應該暫時離開狗狗身旁，俾佢自己一個冷靜下。如果主人唔理狗狗嘅反應，繼續迫狗狗同你玩又或者做某啲特定動作，狗狗好可能會唔開心、嬲，繼而攻擊你。

狗狗秋季旅行熱門地點

食完月餅、放完中秋假就代表我地正正式式入秋喇～趁住秋高氣爽，主人們緊係要多啲帶狗狗出去玩啦～今次就同大家分享一啲適合狗狗同主人一齊去玩嘅公園，等你地同狗狗一齊去個開開心心嘅秋季旅行啦：）

蝴蝶谷道寵物公園

成日聽到大型狗狗嘅主人投訴香港嘅寵物公園太細，山長水遠入到去，狗狗跑兩步就遊完成個公園。你都有呢個煩惱？咁今次介紹嘅公園就啱哂你同狗狗喇～事關呢個公園佔地總共７０００平方米，號稱全九龍最大！仲有好多俾狗狗玩嘅遊樂設施添～啱哂好動嘅狗狗！

地址：深水埗蝴蝶谷道２號

交通：荔枝角站C出口（步行前往約１０分鐘）

開放時間：星期一至日及公眾假期０７００－２２００

查詢電話：２３８６０９４５

彭福公園

彭福公園佔地８００００平方米，係城市中嘅綠洲。公園入面除左有人工湖之外，仲有用草木堆砌嘅植物迷宮～絕對係一個適合一家大細帶埋狗狗一齊去玩嘅公園～！如果主人鍾意幫狗狗影靚仔相嘅話，呢個公園更一定會成為你地嘅至愛～因為入面有好多生長得好靚嘅花花草草同樹，加埋可愛嘅狗狗，點影都靚！

地址：新界沙田馬場

交通：火炭站Ｃ出口；沙田站Ｂ出口轉乘新界專線小巴６０Ｒ
開放時間：    逢星期二、五及夜馬翌日　１０１５－１８００

逢星期三、四、六、日　　０９００－１８００
逢賽馬日及星期一關閉

護齒全攻略

唔知主人有冇幫狗狗清潔牙齒嘅習慣呢？其實狗狗同我地人類一樣，食完野牙仔都會污糟。如果長期唔好好清潔嘅話，會引起口腔疾病架！你都想狗狗健健康康架？一齊黎睇下我地平日可以點幫狗狗護齒啦～

＊勤刷牙＊

狗狗同我地一樣需要勤刷牙去減低患牙周疾病嘅風險。主人們最好從小幫狗狗刷牙，培養狗狗良好嘅刷牙習慣。我地當然明白對工作忙碌嘅主人黎講，要每日幫狗狗刷牙簡直係Mission Impossible ！不過唔好懶呀～主人每星期都應該抽空幫狗狗刷３至４次牙架～

＊餵食潔齒骨＊

明白嘅，要每日幫狗狗刷牙真係好難～但主人都需要幫狗狗做好每日最基本嘅牙齒護理！如果唔得閒幫狗狗日日刷牙，主人可以每日都餵狗狗食潔齒骨，幫佢地輕鬆護齒。咁就可以確保狗狗嘅牙仔乾乾淨淨、健健康康啦！順帶一提，唔同狗種嘅狗狗有唔同嘅顎骨形狀，唔係所有款嘅潔齒骨都岩狗狗食架！好似潔齒骨品牌Greenies咁就分有４種唔同嘅潔齒骨尺碼，幫唔同狗種護齒～主人買之前記住要睇清楚呀：）

＊少食軟性食物＊

相比起硬性食物，軟性食物容易痴住狗狗嘅牙齒，從而令狗狗牙齒表面積聚牙垢，最後搞到有蛀牙同牙齦炎。如果狗狗真係好鍾意食軟性食物，主人不妨喺佢地食完軟性食物之後俾啲有助消除牙垢嘅乾糧狗狗食，減低牙菌滋生嘅機會。

＊定期帶狗狗去接受專業獸醫檢查＊

除左多啲幫狗狗刷牙同少啲俾狗狗食軟性食物之外，主人仲需要每年帶狗狗去獸醫診所，俾狗狗接受專業嘅牙齒健康檢查。獸醫除左會幫狗狗check下牙齒健唔健康、有冇問題之餘，仲會幫狗狗洗牙同清除牙結石～咁就可以確保狗狗牙齒潔白乾淨又穩固啦：）

狗狗咬骨頭大學問

「狗狗鐘意食骨頭」呢個概念我諗連三歲小朋友都好清楚。但食骨頭對狗仔有咩好處主人又知唔知呢？原來當中有好大學問架！

1. 潔齒
   狗狗咬骨嘅時侯，骨頭會磨擦到狗狗牙齒嘅表面。而磨擦嘅過程中，狗狗牙齒表面嘅污糟野亦都會被一併磨走。而家市面上就有唔少潔齒骨品牌，例如Greenies。佢地嘅潔齒骨加入左維他命同蛋白質，幫狗狗潔齒之餘，仲一次過補充佢地需要嘅營養！主人們不妨一試～
2. 補鈣
   呢個係坊間好常見嘅講法。的而且確，骨頭有豐富嘅鈣質，所以俾狗狗咬骨頭係有補鈣功用嘅～但主人千祈唔好誤會愈硬嘅骨頭愈高鈣，其實食太硬嘅骨頭會令狗狗牙齒斷裂架！主人要小心～千祈唔好亂餵呀 >_<
3. 幫狗狗大便成型
   啱啱都講過啦～骨頭含有豐富嘅鈣質。而鈣質有助大便成型。如果你嘅狗狗平時嘅大便比較稀，比較軟身嘅話，主人不妨多啲俾骨頭狗狗咬。相反，如果狗狗本身就有排便困難嘅問題，主人就應該停止俾狗狗咬骨頭喇。