狗狗壞習慣逐個捉

狗狗同小朋友一樣會有壞習慣，需要我地幫手教番好～有啲時，主人見到狗狗某啲小小嘅壞習慣都會選擇忍，但原來有時唔忍得架！有啲壞習慣一定要改！

壞習慣：咬人！

好多狗狗啱啱出世嘅時侯都好鍾意咬人。對佢地黎講，咬人係一種同人玩嘅方法。主人們通常都覺得佢地仲細細隻，咬人都唔會痛，所以都唔會特別教狗狗唔可以咁做。但原來咁樣反而會間接幫狗狗培養左咬人嘅習慣，到佢地大個左，呢種習慣可能就會做成危險架喇>_< 點改好？其實主人應該喺狗狗細細個果陣嚴厲管教狗狗咬人嘅行為，狗狗咬人果陣，主人可以個樣惡啲咁鬧佢，甚至輕輕拍打狗狗個鼻，俾狗狗知道咬人一啲都唔好玩！

壞習慣：鍾意亂跑

住喺香港嘅狗狗成日都長時間留喺室內，所以主人帶親狗狗出街玩，狗狗都會展現異常興奮，不斷狂跑嘅一面！但原來狗狗出到街亂咁跑好危險架，唔單止有可能會走失，香港咁多馬路，狗狗分分鐘會遇上車禍架！如果主人想幫狗狗改善亂跑嘅壞習慣，主人可以去寵物店買一條有伸縮性嘅狗鍊。狗狗聽話果陣就將狗鍊放鬆，如果狗狗亂咁跑走，狗鍊嘅伸縮鍊就會將狗狗勒住。狗狗覺得唔舒服，自然會聽聽話話，跟番主人嘅步調啦：）

壞習慣：唔肯食飯

狗狗好似小朋友，都會有鬧情緒、唔肯食飯嘅情況出現。呢個時侯主人可以點做？狗主Kai Yan就同我地分享「小黑(狗狗)唔肯食飯果陣我會將Greenies當係獎品咁鼓勵佢食野。因為狗狗好鍾意食，所以佢次次見親Greenies都會即刻變到好聽話架～每一次都work架呢條橋！」咁勁咁work我地當然要share俾各位主人啦～！如果你隻狗狗唔肯食飯，不妨都可以試下呢個方法喎：）